एनआरएन अष्ट्रेलियाका अध्यक्षद्वारा नागरिकता मुद्दा अविलम्ब हल गर्न माग

गैर आवासीय नेपाली सँघ (एनआरएनए) अष्ट्रेलियाका अध्यक्ष नन्द गुरुङले गैर आवासीय नेपालीको नागरिकताको मुद्दालाई अविलम्ब हल गर्नुपर्ने माग गरेका छन् ।
संघको आसन्न निर्वाचनमा अध्यक्ष पदमा उम्मेदवारी दिने घोषणा गरेका कुल आचार्यलाई जुम वैठकमार्फत शुभकामना र समर्थन व्यक्त गर्ने क्रममा अध्यक्ष गुरुङले भने, ‘हामीले सन् २००३ देखि नै नागरिकताको विषय उठाउँदै आएका हौं । तर, नेपाल सरकारले हामीलाई अलमल्याइरहेको छ । धेरै ढिलो भयो, अब यो विषयको संबोधन हुनैपर्छ ।’
गैर आवासिय नेपाली सँघ राष्ट्र निर्माणको साझेदारी हुनुपर्ने र नेपालमा लगानी भित्रयाउन विशेष कार्ययोजना र दृढताका साथ नयाँ नेतृत्वले कदम चाल्नैपर्ने गुरुङले सल्लाह दिए ।
संघको निर्वाचनका क्रममा प्रतिनिधि छनौटमा अपनाइएको फर्मुलाबाट समस्या उब्जीएको बताउँदै उनले अहिलेसम्म आफुहरुलाई प्रतिनिधि नम्बर नदिइएको गुनासो पनि गरे ।
‘अष्ट्रेलियामा संघको सदस्य बन्न चाहनेहरु थुपैै्र छन्, तर अहिलेसम्म हामीलाई नै डेलिगेट नम्बर दिइएको छैन, यो समस्या तत्काल हल होस्’, उनले भने ।
अध्यक्षका प्रत्यासी कुल आचार्यप्रति समर्थन जनाउँदै उनले भने, ‘तपाइका एजेन्डा सबै उचित छन् । तपाइको उम्मेदवारीले हामी उत्साहीत भएका छौं । अष्ट्रेलियाका बासिन्दा, साथी र शुभचिन्तकका तर्फबाट तपाइलाई पूर्ण समर्थन छ ।’