पुनर्निर्माणमा सहयोग गर्न लाग्दा महेशकुमार श्रेष्ठलाई बद्नामको प्रयास
काठमाडौँ । गैरआवासीय नेपाली संघ (एनआरएनए) ले आफ्नो अध्यक्ष महेशकुमार श्रेष्ठलाई जोडेर केही सञ्चारमाध्यमले प्रकाशित गरेको समाचारप्रति गम्भीर ध्यानाकर्षण भएको जनाएको छ। नेपाल सरकारसँग सहकार्य गर्दै सार्वजनिक सम्पत्तिको पुनर्निर्माणमा जुट्न लागेको बेला भ्रम फैलाउने प्रयास हुनु दुःखद रहेको संघले बताएको हो।
संघका प्रवक्ता गंगाधर गौतमले बुधवार जारी गरेको विज्ञप्तिमा भनिएको छ, ‘भदौ २३ र २४ गते नेपालमा भएको जेनजी आन्दोलनले देशका महत्त्वपूर्ण सार्वजनिक सम्पत्तिमा ठूलो क्षति पुर्याएको छ। त्यस्तो अवस्थामा गैरआवासीय नेपाली संघ नेपाल सरकारसँग हातेमालो गर्दै पुनर्निर्माणमा सहयोग गर्न तयार छ भन्ने कुरा स्पष्ट पार्न चाहन्छौँ।’ संघका अनुसार अहिले पहिलो चरणमा सुरक्षा संयन्त्रलाई बलियो बनाउन सहयोग गर्ने कार्य अघि बढाइएको छ। विशेष गरी ट्राफिक प्रहरीलाई सहयोग गर्दै सडक सुरक्षामा काम भइरहेको र यसका लागि सम्बन्धित निकायसँग निरन्तर समन्वय भइरहेको जानकारी दिइएको छ।
तर केही सञ्चारमाध्यमले एनआरएनएको नाम प्रयोग गरेर व्यक्तिगत घर बनाउनका लागि पैसा उठाइरहेको भन्ने खालको समाचार प्रकाशित गरेको प्रसङ्गमा संघले आपत्ति जनाएको छ। विज्ञप्तिमा भनिएको छ, ‘व्यक्तिगत प्रयोजनका लागि रकम उठाइएको भन्ने समाचार पूर्णतया निराधार र भ्रामक छ। यसले संस्थाको साखमाथि प्रश्न उठाउने प्रयास मात्र हो।’ यस्तो प्रचारमा एनआरएनएकै बद्री केसी पक्ष सक्रिय रहेको बताइएको छ । जबकि केसी पक्ष हालसम्म जलेको संसद् भवन अगाडि गएर फोटो खिचाउनमा मात्रै सीमित भएको छ ।
संघले भदौ २३ र २४ गतेको आन्दोलनले देशलाई ठूलो आर्थिक, सामाजिक र मनोवैज्ञानिक आघात पुर्याएको भन्दै त्यसबाट उठ्न सबै पक्ष एकताबद्ध हुनुपर्ने आवश्यकता औँल्याएको छ। विशेष गरी सार्वजनिक सम्पत्तिको पुनर्स्थापना र सुरक्षामा सहयोग गर्न गैरआवासीय नेपाली समुदाय अग्रसर रहेको स्पष्ट गरिएको छ।
अध्यक्ष श्रेष्ठले शनिवार बस्ने कार्यसमितिको बैठकले औपचारिक निर्णय गरेर ‘ट्राफिक प्रहरी सिसिटिभी नियन्त्रण कक्ष पुनर्निर्माण’ प्रोजेक्ट अघि बढाउने जानकारी दिए। त्यसका लागि विस्तृत प्राविधिक खाका तयार गरिएको र लागत करिब ७४ लाख रुपैयाँ अनुमान गरिएको उनले बताए।
श्रेष्ठका अनुसार, संघले पहिलो चरणमा काठमाडौँ उपत्यकाको ट्राफिक प्रहरी कार्यालयमा रहेका सिसिटिभी नियन्त्रण कक्ष, निगरानी प्रणाली र आवश्यक उपकरणहरूको पुनर्संचालनमा सहयोग गर्नेछ।
‘सडक सुरक्षा र निगरानी प्रणाली बलियो हुनु देशको शान्ति सुरक्षासँग प्रत्यक्ष जोडिएको कुरा हो। हामीले यसमा योगदान दिनु मातृभूमिप्रति हाम्रो दायित्व हो,’ अध्यक्ष श्रेष्ठले भने।
एनआरएनएले मङ्गलवार नै ‘नेपाल पुनर्निर्माण अभियान’ घोषणा गर्दै विश्वभरका नेपालीहरूलाई सहयोगका लागि आह्वान गरिसकेको छ। भूकम्प, बाढी वा महामारीजस्ता सङ्कटमा पनि गैरआवासीय नेपालीहरूले निरन्तर साथ दिएको स्मरण गर्दै श्रेष्ठले यस पटक पनि मातृभूमि उकास्नै पर्ने बेला आएको बताए।
‘हामी सबै मिलेर नेपाललाई पुनर्निर्माण गरौँ, सुरक्षात्मक संरचना पुनर्स्थापना गरौँ र समुदायलाई फेरि आशावादी बनाऔँ,’ श्रेष्ठले आग्रह गरे।
श्रेष्ठले केही व्यक्तिहरूले फैलाएको आधारहीन प्रचारको कुनै सत्यता नरहेको बताउँदै भने, ‘हाम्रो योगदान विशुद्ध सार्वजनिक हितमा केन्द्रित छ।’ व्यविपद्को समयमा सबै एकताबद्ध हुन जरुरी रहेको बताउँदै उनले यस्तो बेलामा कसैले पनि अफवाह फैलाउन नहुनेमा जोड दिए ।
श्रेष्ठका अनुसार शनिवार हुने बैठकबाट आधिकारिक निर्णय गरेर ठोस कार्य योजना सार्वजनिक गरिने छ । श्रेष्ठ नेतृत्वको आधिकारिक एनआरएनएका अनुसार विगतमा नेपालमा आएका हरेक प्राकृतिक विपत् र सङ्कटका बेला संघले सरकारसँग सहकार्य गर्दै सहयोग गर्ने गरेको छ। भूकम्प, बाढी–पहिरो, महामारीलगायतका कठिन परिस्थितिमा एनआरएनएले राहत, उद्धार र पुनर्निर्माणमा महत्त्वपूर्ण भूमिका खेलेको उल्लेख गर्दै यस पटक पनि त्यही निरन्तरतामा काम भइरहेको संघले जनाएको छ।
तपाइँको प्रतिक्रिया