किरण अधिकारी, ‘लिपिमाला’ र नेपाली भाषा सिक्ने नयाँ डिजिटल सेतु

सिड्नीको एक नेपाली परिवारमा सामान्यजस्तै लाग्ने एउटा क्षण थियो,जहाँ बाबु नेपालीमा बोल्छन्, छोरी अंग्रेजीमा जवाफ दिन्छिन्। यही ‘सामान्य’ दृश्यबाट जन्मियो एउटा असाधारण सपना,भाषा जोगाउने सपना।

यही चाहनालाई मूर्त रूप दिएका छन् किरण अधिकारीले, जो अष्ट्रेलियामा २० वर्षभन्दा बढी समयदेखि सूचना प्रविधि (आईटी) क्षेत्रमा संलग्न छन्। जब आफ्नै सन्तानले नेपालीमा बोल्न छाडे, उनले महसुस गरे, यो त केवल उनको घरको चिन्ता होइन, हजारौं नेपाली परिवारको साझा पीडा हो। यही पीडाबाट जन्मियो ’लिपिमाला’ र अगस्ट ३, आइतबार, सिड्नीमा आयोजित एक विशेष कार्यक्रममा ‘लिपिमाला’ एप सार्वजनिक गरियो।

‘लिपिमाला’ एप कुनै सामान्य भाषा सिकाउने एप होइन। यो एपमा भाषा मात्र होइन, मायासँग गाँसिएको संस्कार छ । बालबालिकाले खेल खेल्दै, गीत गाउँदै, एनिमेसन हेर्दै नेपाली भाषा सिक्न सक्छन्। स्वर–व्यञ्जन मात्र होइन, उच्चारण, शब्द प्रयोग, वाक्य संरचना र व्याकरणसम्म सजिलै बुझ्न मिल्नेगरी सामग्री विकास गरिएको छ।
यस एपमा प्रयोगकर्ताको उमेरअनुसारका खण्डहरू छन्, जुन एप्पल र एन्ड्रोइड दुवै प्लेटफर्ममा उपलब्ध छन्। एपमा प्रारम्भिक सामग्री निःशुल्क भए पनि विस्तारित पाठ्यसामग्रीको लागि न्यूनतम शुल्क तिर्नुपर्छ।

किरण अधिकारी भन्छन्, “लिपिमालाको सपना व्यक्तिगत भए पनि यसको आवश्यकता सामूहिक छ। यो एपले हाम्रा नानीहरूलाई प्रवासमै नेपाली भाषाको जरा समात्ने अवसर दिन्छ।”

कार्यक्रममा नेपाली वाणिज्यदूत सञ्जीव शर्मा, एनआरएनए अष्ट्रेलिया अध्यक्ष अनिल पोखरेल, सामुदायिक अगुवा इन्द्रा बन, प्रतिज्ञा अधिकारी, डिल्लीराम ढकाल, देब गुरुङ,पत्रकार हेमन्त काफ्ले,प्रकाश हमागाईं र साहित्यकार निस्प्रभ सजी जस्ता व्यक्तित्वहरूले प्रवासमा हुर्किंदै गरेका बालबालिकाका लागि आफ्नो भाषा मात्र नभई आफ्नो पहिचान जोगाउने साधन रहेको बताए ।